Молитва свт. Амвросия Медиоланского (IV век)

Молитва для пресвитера, готовящегося к служению литургии

(Свт. Амвросий Медиоланский):

“Молю Тя, Господи, самаго ради Святых Тела и Крове Твоея таинства, имиже всегда в храме Твоем питаеми и напаяеми, очищаеми, освящаеми и обожаеми бываем, да силою Твоею укреплен, благою совестию ко олтарю Твоему приходя, сия небесная таинства имею в себе в живот и спасение, по слову святому Твоему: Хлеб, егоже Аз дам, Плоть Моя есть, Юже Аз дам за живот мира, ядый Мя, и той жив будет Мене ради. Хлебе сладчайший, уврачуй устне сердца моего, да чувствую во мне любве Твоея сладость, исцели всяк недуг, да, кроме Тебе, никоея же пожелаю красоты. Хлебе чистейший, всякия сладости и благовония преисполненне, вниди в сердце мое и сладостию благовония Твоего наполни внутренняя души моея. Тобою питаются Ангели на небеси преизобильно: да насытится по силе своей Тобою и пришлец человек на земли. Хлебе святый, Хлебе живый, Хлебе вожделенне, сходяй с небесе и даяй живот мирови, вниди в сердце мое и очисти мя от всякия скверны плоти и духа, вниди в душу мою, внеуду и внутрьуду освящая и просвещая, буди моей души хранение всегдашнее и тела здравие. Отжени от мене находящих на мя, да бежат от лица Твоего ненавидящи мя, да, Тобою огражден, с Тобою прейду в вечное Твое царствие, идеже не покровенне, но лицем к лицу Тебе узрим, егда предаси Царство Богу и Отцу, да будет Бог всяческая во всех. Доныне алчу и жажду, но тогда насыщуся, внегда явит ми ся слава Твоя, в нейже царствуеши со Отцем и Святым Духом во веки. Аминь”.