Акафист Пресвятой Богородице в честь иконы Ее ИЗБАВЛЕНИЕ ОТ БЕД СТРАЖДУЩИХ

Пред иконой Пресвятой Богородицы «Избавление от бед страждущих» молятся о благословении брака; к ней приходят с мольбой об освобождении от пороков, притекают матери с ходатайством о погибающих детях, о здравии и благополучии детей, об исцелении болезней глаз и слепоты, от зубной боли, от лихорадки, от недуга пьянства, при головной боли, о вразумлении отпавших от веры Православной и о возвращении заблудших в Церковь.

Акафист Пресвятой Богородице в честь иконы Ее ИЗБАВЛЕНИЕ ОТ БЕД СТРАЖДУЩИХ

Икона Пресвятой Богородицы "Избавление от бед страждущих"Кондак 1

Избранней от всех родов Пречистей Деве Богородице, благодатную помощь нам являющей, благодарственная пения приносим. Ты же, яко имущая державу непобедимую, от всяких бед и скорбей свободи ны, умильно Тебе поющия: Радуйся, Всеблагая Владычице, от бед страждущих избавляющая.

 

Икос 1

Архангел и Ангел множество Тебе, честнейшую Херувим и славнейшую без сравнения Серафим, небесными гласы непрестанно славословят. Мы же, умиляющеся о Твоих благодеяниих, на нас бывших, дерзаем звати Тебе:

Радуйся, Отца Небеснаго Избраннице.

Радуйся, Троическаго Совета Таиннице.

Радуйся, Духом Святым осиянная.

Радуйся, Спасителя мира рождшая.

Радуйся, Ангельских сил превысшая.

Радуйся, в женах Преблагословенная.

Радуйся, Всеблагая Владычице, от бед страждущих избавляющая.

 

Кондак 2

Видяще Тя, Богоизбранная Отроковице, вся Небесныя Силы у Престола Сына Твоего и Бога нашего за ны молящуюся, воспевают величие и милосердие Твое. Мы же, грешнии, на земли, в помощь Тя усердно призываем, непрестанно воспевая Богу: Аллилуиа.

 

Икос 2

Разумом от Бога свыше просвещеннии, на чудотворный лик Твой взирающе, небесе и земли Царице, разумеем, яко дарова Тя Сын Твой всем страждущим во избавление от бед. Приими же, Всеблагая, от нас пения сицевыя:

Радуйся, бедствующих Мати.

Радуйся, страждущих утешение.

Радуйся, безнадежных упование.

Радуйся, падших возстание.

Радуйся, грешных Споручнице.

Радуйся, погибших взыскание.

Радуйся, Всеблагая Владычице, от бед страждущих избавляющая.

 

Кондак 3

Сила Вышняго дарова Тя, Заступнице и Ходатаице наша, в помощь и спасение миру, во гресех погибающу; мы же, Тобою избавленнии от всякия беды и напасти, благодарственно поем Сыну Твоему: Аллилуиа.

 

Икос 3

Имущи непостижимую любовь к роду человеческому, Преблагая Владычице, ни единыя слезы не отвергла еси усердно Тебе молящихся и взывающих:

Радуйся, бедствующих скорое услышание.

Радуйся, плененных свобождение.

Радуйся, погибающих чудное спасение.

Радуйся, печальных и скорбных утешение.

Радуйся, падающих подкрепление.

Радуйся, нерадивых вразумление.

Радуйся, Всеблагая Владычице, от бед страждущих избавляющая.

 

Кондак 4

Буря многих бед и напастей обстоит ны, темже молим Тя, мира Заступнице: спаси нас, изнемогающих, Ты бо еси избавление наше; сего ради о Тебе поем Богу песнь: Аллилуиа.

 

Икос 4

Слышаще роди человечестии велию любовь Твою к христианом и Твое всемощное заступление от всяких находящих на ны лютых, научишася пети Тебе:

Радуйся, рода человеческаго от бед избавление.

Радуйся, бурь житейских укрощение.

Радуйся, плачущих скорая Утешительнице.

Радуйся, радости духовныя Подательнице.

Радуйся, болящих благонадежное посещение.

Радуйся, заблуждших исправление.

Радуйся, Всеблагая Владычице, от бед страждущих избавляющая.

 

Кондак 5

Боготечней звезде подобна святая икона Твоя, Богородице, мрак страстей в грехолюбивых сердцах разгоняющая, да во свете любви Твоея вси роди христианстии узрят Господа спасающаго вся и возопиют Ему благодарственную песнь: Аллилуиа.

 

Икос 5

Видяще христоименитии людие Тобою подаваемое им внезапное от многообразных бед избавление, Тебе яко Благую и Милостивую рода христианскаго Заступницу величаху. Сего ради прилежно молим Тя: заступи, покрый и соблюди нас от бед и нападений вражиих, да радостно поем Ти:

Радуйся, здравия душевнаго и телеснаго Подательнице.

Радуйся, целомудрия Охранительнице.

Радуйся, печалей наших отгнание.

Радуйся, в скорбех наше утешение.

Радуйся, искушаемым руку помощи простирающая.

Радуйся, всем потребным ко благочестию снабдевающая.

Радуйся, Всеблагая Владычице, от бед страждущих избавляющая.

 

Кондак 6

Проповедуют помощь Твою и любовь, Мати Божия, вси исцеленнии, утешеннии и спасеннии Тобою от бед и напастей, благодаряще Тя о всех благодеяниих, на ны изливаемых, вопиюще о Тебе Сыну Твоему и Богу: Аллилуиа.

 

Икос 6

Возсия нам свет спасения – дивная икона Твоя, Богомати, еюже чудеса и исцеления всем источаеши с верою пред нею молящимся. Мы же, радуяся таковому о нас промышлению, умильно поем Ти:

Радуйся, яко мглу греховную разгоняеши.

Радуйся, яко нерадение о спасении истребляеши.

Радуйся, души светом боговедения просвещающая.

Радуйся, на путь спасительный наставляющая.

Радуйся, твердое веры утверждение.

Радуйся, на Страшном Суде заступление.

Радуйся, Всеблагая Владычице, от бед страждущих избавляющая.

 

Кондак 7

Хотящи всем показати любовь Твою велию к христианскому роду, Богородице Преблагая, благоволила еси явити чудную икону «Избавительница от бед страждущих» именуемую, да вси, в болезнех и скорбех изнемогающии, имеют Тя Помощницу и Затупницу, вопиюще о Тебе Христу Богу: Аллилуиа.

 

Икос 7

Новую и нечаянную явила еси нам милость Свою, Царице Небесная, егда под державную руку Твою нас, недостойных, восприявши, дивно покров над всем миром христианским простерла еси. Сего ради вопием Ти:

Радуйся, палато Духа Пресвятаго.

Радуйся, Царице Державная.

Радуйся, Владычице Небесная.

Радуйся, под Твой всемощный покров нас восприявшая.

Радуйся, защищение Твое нам являющая.

Радуйся, нападения вражия отражающая.

Радуйся, Всеблагая Владычице, от бед страждущих избавляющая.

 

Кондак 8

Странное чудо зрим о Тебе, Богородице, елико бо телеснии и душевнии недузи святыя Твоея иконы целованием исцеляются, вера утверждается и умиления сердца наша исполняются, вопиющих Богу: Аллилуиа.

 

Икос 8

Вси сущии во мраце скорбей и обуреваемии мглою страстей, прибегают к доброму пристанищу и вспоможению – покрову Пресвятыя Девы, избавляющему от бед страждущих, вопиюще Ей:

Радуйся, от глада нас избавляющая.

Радуйся, хлебом небесным нас питающая.

Радуйся, жажды духовныя утоление.

Радуйся, земледельцев благословение.

Радуйся, источницы жизни вечныя нам изливающая.

Радуйся, духовною сладостию нас напояющая.

Радуйся, Всеблагая Владычице, от бед страждущих избавляющая.

 

Кондак 9

Все естество ангельское похвальная пения приносит Тебе, Божией Матери и Царице, человецы же на земли благодарственная воспевают Ти, Пресвятая Богородице, избавление являющей и радость в скорбех подающей, зовуще Сыну Твоему: Аллилуиа.

 

Икос 9

Вития многовещанныя не возмогут по достоянию воспети Твое, Всеблагая Мати, скорое и чудесное от бед страждущих избавление. Мы же, Тобою облагодетельствованнии, дерзаем глаголати таковая:

Радуйся, чудесы Твоими веру в нас укрепляющая.

Радуйся, беды и напасти наша скоро истребляющая.

Радуйся, знаменьми Своими нас вразумляющая.

Радуйся, иконами Твоими нас возвеселяющая.

Радуйся, благословение Божие нам низводящая.

Радуйся, сердца наша очищающая и освящающая.

Радуйся, Всеблагая Владычице, от бед страждущих избавляющая.

 

Кондак 10

Спасти хотя всякую душу христианскую, Богомати, с неизреченною любовию печешися о ней, милуеши и питаеши, назидаеши и вразумляеши, да вопиет Сыну Твоему: Аллилуиа.

 

Икос 10

Стена нерушима еси всем верным, Пресвятая Дево Богородице: дивным бо образом Твоим, «Избавление от бед страждущих» именуемым, мир христианский озаряеши и ограждаеши от врагов видимых и невидимых. Мы же, притекая к Твоему заступлению, покланяемся ему и с любовию лобызаем, воспевая Ти:

Радуйся, скорая нам от бед Избавительнице.

Радуйся, мудрая в недоумениих наших Наставнице.

Радуйся, в скорбный час души наша утешающая.

Радуйся, вечныя радости на небесех нас сподобляющая.

Радуйся, от наветов злых духов и человек наше заступление.

Радуйся, целомудреннаго и благочестиваго жития охранение.

Радуйся, Всеблагая Владычице, от бед страждущих избавляющая.

 

Кондак 11

Пение непрестанное приносят Ти, Царице Небесная, Тобою избавленнии от бед и напастей и, Тобою паки радость обретши, Божественному Сыну Твоему благодарственно воспевают: Аллилуиа.

 

Икос 11

Светосияющим светилом лучезарным во мраце греха явися нам образ Твой, Владычице, темже мы, грешнии, радуемся, имуще таковую чудную икону Твою, яко залог Твоего к нам благоволения, и надеяся на Твоя матерния молитвы и скорое их услышание, умильно глаголем:

Радуйся, радостей неистощимый источниче.

Радуйся, скорбей скорое прогнание.

Радуйся, от бед всемощная Защитнице.

Радуйся, покоя благая Подательнице.

Радуйся, слез наших и печалей утоление.

Радуйся, о гресех наших Господа умилостивление.

Радуйся, Всеблагая Владычице, от бед страждущих избавляющая.

 

Кондак 12

Благодать, источающаяся от иконы Твоея «Избавление от бед страждущих», Всеблагая Дево, струи исцелений обильно подает всем с верою и любовию к ней притекающим, подвизая всех умильно пети о Тебе Сыну Твоему и Богу: Аллилуиа.

 

Икос 12

Поюще Твоея иконы дивное явление и Твое милостивное на нас, грешных, призрение, восхваляем любовь и милосердие Твое, Пречистая, к роду человеческому, и со умилением покланяяся Тебе в честней Твоей иконе, веруем и уповаем, яко испросиши у Сына Твоего и Бога нашего вся благая в жизни сей и будущей, вопиющим Тебе таковая:

Радуйся, от смерти и вечнаго огня изымающая.

Радуйся, мертвых душею воскрешающая.

Радуйся, предсмертное наше упование.

Радуйся, по смерти наше упокоение.

Радуйся, на Страшнем Судищи Христове наша Споручнице.

Радуйся, о блаженных обителех небесных наша Ходатаице.

Радуйся, Всеблагая Владычице, от бед страждущих избавляющая.

 

Кондак 13

О Всепетая Мати, Пресвятая Дево Богородице, умилосердися ныне и помилуй нас, в лютых и тяжких бедах сущих, и научи нас сердечно воспевати Богу, Тобою нас спасающему: Аллилуиа.

(Этот кондак читается трижды, затем икос 1 и кондак 1).

Молитва

Заступнице Усердная, Благоутробная Господа Мати, к Тебе прибегаю аз, окаянный и паче всех человек грешнейший: вонми гласу моления моего и вопль мой и стенание услыши, яко беззакония моя превзыдоша главу мою, и аз, якоже корабль в пучине, погружаюся в море грехов моих. Но Ты, Всеблагая и Милосердная Владычице, не презри мене, отчаяннаго и во гресех погибающаго; помилуй мя кающагося во злых делех моих, и обрати на путь правый заблуждшую окаянную душу мою. На Тебе, Владычице моя Богородице, возлагаю все упование мое. Ты, Мати Божия, сохрани и соблюди мя под кровом Твоим, ныне и присно и во веки веков. Аминь.

 


,